kvenlegir kostir

Rúmteppi - Grandmothers Flower Garden

2008-05-01T14:07:00.000-07:00

Svo langt er orðið síðan ég byrjaði á þessu verkefni að ég man ekki lengur nákvæmlega hvenær það var, hvort það var 2004 eða 2005. En þetta eru eintómir sexhyrningar, 6 sm breiðir. Ég er nokkurn veginn komin með toppstykkið en á enn eftir að gera einn kant til að ná fullri stærð og svo þarf náttúrulega að setja filt og bak og stinga allt saman. Ég hef ekki dundað mikið í því í vetur því fyrir utan að hafa haft nóg að gera í skólanum, hef ég ekki komið mér niður á hvaða aðferð við stungusauminn henti best. Ég ætlaði fyrst að hafa þetta algjörlega handunnið, en ákvað svo í vetur að hafa kantana vélsaumaða, er ennþá efins um að þetta hafi verið rétt ákvörðun. En handstungið skal það allavega vera! Ég er ákveðin í að stinga innan með hverjum sexhyrningi og reyna svo að finna falleg lauf til að stinga út á köntunum. Við sjáum til hvernig útkoman verður en það er líka svolítið gaman að hafa verkefni sem maður hugsar svona mikið um og er ekki með neina tímapressu á að klára - það kveikir þó alltaf í mér græðgina að klára þegar ég máta það á rúmið :-)

Útsaumur 2007

2008-04-30T15:35:00.001-07:00

Eftir Mill Hill æðið var kominn tími til að spreyta sig á einhverju nýju og ég fann skemmtilega snjókarlamynd hjá Salt&Pepper minnir mig. Pantaði hana full eftirvæntingar og hélt að það kæmi kit upp í hendurnar á mér, enda orðin góðu vön úr netversluninni hjá Needle and I. En svo var ekki, það kom bara munsturblað! Svo ég leitaði á náðir sérfræðingsins í Erlu á leið heim úr tollinum, sem seldi mér bæði java og garn svo ég gæti byrjað. Ég var nokkuð lengi að dunda við þýðinguna á textanum og að koma honum á réttan stað - og æ æ ég á ennþá eftir að strekkja myndina í rammann, lá svo á að koma þessu upp fyrir jólin síðustu sko :0)

Árstíðir a la Mill Hill 2007

2008-04-30T15:17:00.000-07:00

Ég rakst á bloggumfjöllun um Mill Hill haustið 2006 og sló til og pantaði mér eina mynd. Ég var þó mjög efins um að þetta væri nokkuð flott - en komst að öðru og uppgötvaði líka að það eru ekki góðar myndir á Mill Hill síðunni. Eftir að hafa gleymt mér við að sauma hana rann á mig einskonar Mill Hill æði og ég saumaði og saumaði allan þennan vetur. Mér leið svo vel að ég fann ekkert fyrir árstíðabundinni depurð eða leiðindum og hlakkaði til að koma heim og setjast við sauma.
Fyrsta myndin mín var af þremur svörtum kettlingum. Ég þýddi söluskiltið, mér finnst bara einhvern veginn ekki hægt að vera að skreyta heimilið með enskum frösum. Næsta mynd var snjókarlinn og þá vantaði mig vorþema og keypti hvíta píláragirðingu einhverra hluta vegna, loks kom blómavagninn og ég var lengi að finna gott heiti á hann, endaði í Sumarblóm...
Litlu myndirnar gera þeim engan veginn góð skil, ekki frekar en á sölusíðunni, því það glitrar og skín á perlurnar sem gerir þær virkilega fallegar. En klikkið á hverja og njótið!

Hannyrðir og handavinna

2008-04-30T13:04:00.000-07:00

Greinilegt er að kvenlegir kostir eru ekki útdauðir því hér í netheimum er að finna ógrynni mjög vandaðra hannyrðavefja. Það er ætlunin að safna hingað inn því sem ég rekst á í ferðum mínum hér í þessari sýndarveröld. Margir eru bloggvefir þar sem jafnvel er hægt að finna góðar leiðbeiningar, en eins verða hér tenglar í vefverslanir.

Og svo hendir maður nú inn hérna einhverjum myndum af eigin afurðum þegar eitthvað hefur klárast!